GURIT LUNGIT

REMBULAN MOBLONG

Dening : sdwijosusastro

Nalika rembulan moblong ucul saka gendhonganing jagad

Ayo, gegancangan mapag abyoring lintang mayuta

Dimen biruning langit kang bakal kagelar ing wengi iki

Bisa ginambaran pangangen-angen geganthaning uripmu

Nalika rembulan moblong mancati tataraning langit

Ayo, gegancangan mapag tumuruning tetes atising embun wengi

Dimen gegambaran geganthaning uripmu

Bisa den pulas karana abanging sedya

Nalika rembulan moblong panjer tengahing wengi

Ranggehen abyoring lintang sayuta

Lan jumputana tetes atising embun wengi

Kang kekinclong ing pucuk ijoning gegodhongan

Dimen geganthaning urip kang wus kok gambari

Ing jembaring pangangen-angen

Bisa kapatri ing ati sanubari

Lan nalika rembulan moblong wus pangklong tumpak gigiring arga

Sumetana oboring laku lan cawisna tekening urip

Dimen gegambaran geganthaning urip kang wus kapatri

Bisa kababar bareng mletheking baskara esuk.

JANGKA

(Dening : Sdwijosusastro)

Swara dumeling wecaning pujangga

Urut rumasuk ing dhadha jiwa Jawa

Jaka Lodhang – Sabda Pranawa

Anggung ngulati ubenging jagad

Rodhaning jagad rinegem jangka

Nitihi nam-namaning nasib manungsa

Obah mosik anut wasesaning Kawasa

Jangka jagad jejeg jumangkah

Ngregem wektu wewentehan

Jayaning jagad jinunjung karana jangka

Jejembering jagad jinebol karana jangka

Jangka-jangka kuna

Kinodrat mberat reretuning rat

Ratu-raton rengeting rakyat

Rinempu remuk karana jangka

Oh …. Ronggowarsito

Jangkamu ajeg jumangkah

Njangkahi jaja-jaja jagad alit

Njangkahi jembaring jagad agung

Jangka-jangka kuna

Rineksa rape ting jagad sunya ruri

Anut jaman kelakone

Obah mosik awit wasesaning Kawasa

Sang pujangga wus mbuka wiwaraning warana

Sabda Pranawa wus kawuri

 Napaki windu kuning

 Si Wewe Putih kang gegaman tebu wulung

 Mrajaya wedhon kang idune mandi

Jaka Lodhang ngedhangkrang sru muwus:

“Gunung mendhak-jurang mbrenjul”

Tunggak jarak mrajak, tunggak jati mati

ewasono

Mendhaking si gunung tetep katon agung

Mbrenjule si jurang gesong tetep jugrug

Tan kawawa pepayung song-song agung

Mbok parawan sangga wang dhuhkiteng kalbu

 Buneging kalbu mbudidaya nggugah bangsaku

 Kang sayah kasulayah awit kuku wisaning penjajah

 Linambaran donga- sesanti:

 “Sura dira jayaningrat, lebur dening pangastuti”

 Bangsaku gumregah galeyah-galeyah

 Kanthi gagah ambnedhah ruji-ruj penjajah

Wecaning pujangga kang wus pinasthi:

Sajroning madya akhir, Wiku Sapta Ngesthi Ratu

Ratu-raton rengeting rakyat rantas

Indonesia : Merdeka!!!!!

Kamardikan dudu gayuhan pungkasan

Kamardikan amung titihan rukmi

Siji kang den ancas: Masyarakat adil makmur

Tinemune wong ngantuk anemu kethuk,

 Malenuk samargi-margi,

Marmane bungah kang anemu,

 Marga jroning kethuk isi,

 Kencana sesotya abyor.

                           (Sleman, 16 Agustus 1991)

BENDHE REVOLUSI

      (Dening : Sdwijosusastro)

  

Bendhe revolusi umyung gumuruh

Aruh-aruh anak pertiwi jiwa andana warih

Iki bumimu, iki wutah getihmu!

Apa pinangka pisungsungmu

Kalamun bumi lan bangsamu dicecamah penjajah?

Apa pinangka sumbangsihmu

Kalamun wulu wetu watah getihmu ditawu satru?

Bendhe revolusi geter gumleger

Ngobong semangat anak pertiwi jiwa satriya

Iki bumimu, iki wutah getihmu!

Ayo, bersatu usir penjajah!!!!!!!

Bendhe revolusi pinangka tengara

Adeging Republik Indonesia

Ayo, jaga Negara iki!!

Isi kamardikan iki!!

Awit nalika leluhurmu titip kamardikan iki

Ledhoring mimis mbabat mayuta-yuta nyawa

Mula, aja mbok sengguh kalamun kamardikan iki

Amrik arum lir cendhana sari

Dene kowe para penerus

Mung bisa lungguh jegang sila tumpang

Tanpa krekat ngisi kamardikan negara iki

Aja mbok sengguh kalamun para syuhada kanga taker marus

Bisa nyecep maduning kaswargan

Kalamun kowe para penerus

Mung bisa apal nembang lagu perjuangan

Tanpa urun berjuang

Ayo, obong makantar semangat membangun

Dimen gumerahing bendhe revolusi

Ora mung dumeling pinangka pepeling adeging republik iki

Nanging dadi cambuk gumeroting rodha pembangunan

                                                (Sleman , 16 Agustus 1993)

 

KASETYAN

(Pisungsung katur Mbah Marijan)

Dening : Yohanes Siyamta

Ngugemi dhawuhing sesembahan

Kang kacetha ing layang kekancingan

Panjenengane teguh nindakake ayahan

Tuhu setya ing jejibahan

Temah wani ngadhepi kanyatan

Rikala bebaya nekani

Gunung Merapi metu geni

Saperangan wis padha ngungsi

Simbah isih panggah njagi

Nadyan tuwa tetep rosa

Datan mingkuh ing bebaya

Ora wedi sakeh rubeda

Wus dadi kersaning Pangeran

Mbah Marijan tinimbalan sowan

Pinuju nindakake ayahan

Sholat sujud mring Pangeran

Dosane muga antuk pangapura

Amale muga ditampa

Lan Gusti angganjar swarga

(Mekar Sari, Minggu Pahing 31 Oktober 2010)

WIS ORA ANA MANEH KANGGO KOWE

                                               Anggitane Yunani

                       

                        Wis ora ana maneh kanggo kowe, anakku

                        Dongeng kancil apa uthek-uthek ugel

                        Nyengkelit kendhi bujel

                        Pak guru repot penataran, ibu asring tindakan

                        Wacanen dhewe ing kamar

                        Komik Bionic, Flash Gordon lan Sailormoon

                        Wis ora ana maneh kanggo kowe anakku

                        Nglangute pangkur palataran

                        Swarane gendhing dolanan

                        Yen rembulan ndadari sumunar padhang jingglang

                        Setelen video game, kaset obralan lan tamagoci

                        Marga wis ora keprungu jamuran ing wayah wengi

                        Nini thowok kari bathok sumendhe gowok

                        Neng kamar simbah muwun sesenggukan

                        Nangisi dina wuri kang ilang

                        O, putuku kabuncang angine jaman

                        Kabeh pangan akeh kang imporan

                        Ombyaking jaman

                        Bias kacegah kanthi iman sing mapan

                                                            (Parikesit No.544/1983)